Monforte acolle este sábado a gala do XI Concurso de Proxectos Empresariais Semente Ribeira Sacra
O Parador de Turismo de Monforte será este sábado, 8 de novembro, o escenario da presentación e gala de entrega de premios da XI edición do Concurso de Proxectos Empresariais Semente Ribeira Sacra, unha iniciativa que leva máis dunha década impulsando o emprendemento e a innovación no medio rural.
O certame, que cumpre once anos de traxectoria, busca proxectos innovadores que contribúan a desenvolver o territorio e poñan en valor os seus recursos. Aínda que dá preferencia ás propostas vinculadas coa Ribeira Sacra, está aberto a persoas de calquera lugar do mundo que queiran poñer en marcha unha idea empresarial no rural.
Desde as 10:00 horas, os dez proxectos finalistas defenderán as súas propostas ante o xurado. Entre eles figuran iniciativas como “Franquicias Gourmet Gallego”, que pretende abrir tendas por toda España con máis de 400 referencias de produtos galegos, “Galegheeño, o Ghee da Ribeira Sacra”, centrado na elaboración dun superalimento a base de leite de vacas alimentadas a pasto, ou “Casa Museo Genia Trigo”, un proxecto artístico e etnográfico con espazos culturais e experienciais.
Tamén se presentan propostas como “Ensácrate”, dedicada ao deseño de viaxes e experiencias auténticas na Ribeira Sacra; “O Fogar dos Soños”, que combina a produción artesanal de queixos e xeados de cabra coa oferta de visitas e talleres; “Alambiqueiros da Sacra Terra”, que busca crear unha destilería profesional para transformar o bagazo das adegas en augardente; ou “Respiro Sostible”, centrado na fabricación de papel ecolóxico a partir de residuos vexetais.
Outras iniciativas finalistas son “La Escuela del Origen”, un espazo de acompañamento a colectivos vulnerables; “Piel Natura”, dedicada á cosmética sólida ecolóxica e aromaterapia galega; e “Viñalert”, que propón un sistema de monitorización continua das vides e análise dos nutrientes do solo e da planta.
O fallo do xurado coñecerase ao final da xornada, tras a cea e gala de entrega de premios. O acto contará coa presenza da directora xeral de AGADER, Mª Paz Rodríguez, da directora xeral de Traballo Autónomo e Economía Social, Marta Mariño, así como de representantes institucionais, universitarios e empresariais.
Nesta edición, ademais dos galardóns económicos, 10.000 euros para o primeiro premio, 6.000 para o segundo e 4.000 para o terceiro, os proxectos finalistas poderán participar nun programa de asesoramento estratéxico financiado por AGADER, que se desenvolverá durante o primeiro semestre de 2026.