Monforte acolle esta fin de semana o “Mercado para a Medieval”
O alcalde de Monforte, José Tomé Roca, inaugurarase este sábado 5 de abril ás 11.30 horas o "Mercado para a Medieval" na zona dos mercados da Praza de Abastos de Monforte, "un certame co que buscamos potenciar e promocionar a Feira Medieval, un evento turístico que atrae unha gran afluencia de público e visitantes a Monforte durante o fin de semana de Semana Santa". Este ano 2025, a Feira Medieval celebra a súa 21ª edición, que terá lugar durante o fin de semana do 19 e 20 de abril.
Durante a inauguración do Mercado para a Medieval, José Tomé Roca dará a coñecer o programa oficial de actividades desta 21ª edición da Feira Medieval, que se celebrará os días 19 e 20 de abril de 2025 e que, tal e como destacou o alcalde, “segue atraendo a miles de visitantes a mergullarse no noso pasado medieval e a facer da nosa Feira o epicentro de Galicia ese fin de semana”.
Mercado para a Medieval 2025
O Mercado para a Medieval é un preludio da Feira Medieval, polo que a súa temática gira arredor da preparación dese evento. Deste xeito, o Mercado contará coa presenza de 11 stands, nos que se poderán atopar traxes medievales confeccionados a man para adultos e nenos, complementos para os traxes, artesanía, bisutería, decoración de mesas de terraza para hostalaría, así como decoración de mesas medievales de comedor; en definitiva, os preparativos para a Feira Medieval.
O sábado 5 celebrarase un dos actos centrais do Mercado Medieval, o Desfile de Traxes Medievales e Complementos, que terá lugar ás 18.30 horas, con entrada libre e, como novidade, este ano estenderase o percorrido do desfile polas rúas, ata a entrada do espazo gastronómico, dada a gran afluencia de público que se rexistrou en edicións anteriores. Desfilarán 92 traxes de época, presentados por 23 modelos, adultos e nenos, e terá unha duración aproximada dunha hora, para que todos poidan escoller cómodamente os seus traxes para lucir.