Monforte acolle a final da II Calasancio Cup cun triunfo do SC Braga no torneo sub-14
O alcalde de Monforte, José Tomé Roca, presidiu a entrega de trofeos ao campión e ao subcampión da segunda edición da Calasancio Cup, un torneo de fútbol infantil sub-14 organizado polo Club Calasancio coa colaboración do Concello de Monforte. A competición desenvolveuse ao longo de dúas xornadas nos campos de fútbol Álex Blanco, Luis Bodegas e A Pinguela, e reuniu na cidade equipos de alto nivel procedentes de Galicia, Asturias, Castilla y León e Portugal.
O rexedor asistiu á final acompañado polo concelleiro de Deportes, José Manuel Mougán, e polo presidente do CP Calasancio de Monforte, Juan Carlos Díaz. O encontro decisivo celebrouse no campo municipal de A Pinguela e enfrontou ao RC Celta de Vigo e ao SC Braga. O conxunto portugués proclamouse campión da II Calasancio Cup despois de manterse invicto en todos os partidos disputados ao longo do torneo. Durante a clausura, o alcalde felicitou tanto ao campión como ao subcampión e participou na entrega de trofeos e medallas a todos os xogadores e aos corpos técnicos dos equipos finalistas.
O Concello de Monforte colaborou na organización do torneo mediante a cesión das instalacións deportivas e a achega dos premios. Neste contexto, José Tomé Roca reafirmou o compromiso do seu equipo de goberno co deporte base monfortino, facendo especial fincapé no apoio ao fútbol formativo e á mocidade deportista da cidade.
O alcalde puxo tamén en valor iniciativas como a II Calasancio Cup, que converteron Monforte na capital do fútbol base do noroeste peninsular durante varios días, ao reunir clubs de gran nivel competitivo. Segundo destacou, este tipo de eventos supoñen unha oportunidade para o público afeccionado ao deporte base e contribúen á visibilidade, á proxección exterior e á dinamización da actividade económica local.
A primeira fase da II Calasancio Cup celebrouse o 27 de decembro coa participación de 12 equipos, mentres que a fase final tivo lugar o sábado 3 de xaneiro, cun total de 20 formacións en competición, entre elas algunhas das mellores canteiras galegas xunto con equipos invitados de Portugal, Asturias e Castilla y León.