Miguel Ángel Sotuela deixa a alcaldía de Ribas de Sil
Miguel Ángel Soutela anunciou este sábado no Pazo de San Marcos que deixa a Alcaldía de Ribas de Sil ao xubilarse, ao igual que fará o concelleiro Luis Rodríguez polo mesmo motivo.
“Chegou o momento de dar un paso a un lado na política. É unha filosofía que tiñamos de servizo público os dous e no momento no que nos xubilamos debemos deixar que outra xente máis nova continúe o labor que nos viñamos desenvolvendo”, así explicou a decisión que veñen de adoptar.
O que foi alcalde durante 26 anos fixo un repaso do seu tempo no Concello, como a elaboración de Plan Xeral, a elaboración da rede de saneamento, a construción de traídas de auga novas, a posta en marcha do Centro de Atención a Maiores, a construción dun cámping e de dous museos; así como a adquisición dun camión de bombeiros ou dun camión do lixo, entre tantos avances para o municipio de Ribas de Sil. “Queda en boas mans o Concello, xente con moita experiencia que leva con nós moitos anos e que sabe perfectamente rexer o Concello. Darán continuidade ás liñas de traballo que viñamos desenvolvendo”, avanzou.
Pola súa banda, o presidente da Deputación de Lugo, José Tomé Roca, valorou o traballo desenvolvido ao longo destes anos polos dous e desexoulles unha “xubilación moi longa, que desfrutedes nova etapa xunto á familia, pero non deixedes de estar”. Sotuela anunciou que o vindeiro xoves, 28 de novembro, celebrarase un Pleno na Casa do Concello ás 18.00 horas onde deixarán a súa acta.