"Merca no teu Comercio" achega premios e dinamización ao comercio de Quiroga
O municipio de Quiroga foi escenario esta mañá da entrega dos premios da campaña Merca no teu Comercio, unha iniciativa promovida pola Xunta de Galicia en colaboración coa Federación Galega de Comercio para fomentar o consumo no pequeno comercio local. O acto contou coa presenza do director xeral de Comercio e Consumo, Gabriel Alén, e do presidente da Federación, José María Seijas, que destacaron o impacto positivo da acción no comercio de proximidade.
A campaña tivo lugar durante a primeira quincena de xullo nos concellos de Quiroga, Folgoso do Courel e Ribas do Sil, cunha acollida moi favorable por parte dos veciños e comerciantes da zona. No marco deste programa, realizouse hoxe na praza da Rúa Lago de Quiroga un sorteo en directo no que se repartiron 20 tarxetas prepago de 50 euros cada unha, que poderán ser empregadas nos establecementos adheridos ata o 31 de decembro.
Durante o evento, Gabriel Alén destacou que esta iniciativa busca “non só premiar aos consumidores que confían no comercio local, senón tamén contribuír a revitalizar a economía dos concellos galegos e manter vivo o tecido comercial tradicional”. Tamén lembrou que a campaña segue activa noutros puntos da provincia de Lugo: ata o 25 de xullo, os veciños da Fonsagrada poden participar, e a iniciativa permanecerá vixente ata o 4 de agosto nos municipios de Burela, Cervo, Covas, O Vicedo e Xove.
Para participar, os consumidores só teñen que rexistrar as súas compras a través da web oficial da campaña ou directamente nos establecementos participantes. Deste xeito, contribúen ao impulso dun modelo económico máis sostible, próximo e humano.