Manzaneda afonda na memoria histórica coa presentación do libro 'El último maqui'
O municipio ourensán de Manzaneda será escenario o mércores 30 de xullo dun acto centrado na recuperación da memoria histórica. Trátase da presentación do libro 'El último maqui. Vida e lenda de Mario de Langullo', unha obra do xornalista e escritor Juan Carlos Alonso que reconstrúe a intensa vida dun dos últimos guerrilleiros antifranquistas da península. O evento celebrarase ás 20:00 horas no Centro Interxeracional e contará coa participación do autor e do alcalde de Manzaneda, Amable Fernández.
A través dun traballo rigoroso de investigación, Juan Carlos Alonso recompón o percorrido vital de Mario de Langullo, un home que pasou máis de tres décadas fuxido no monte, resistindo á represión franquista e simbolizando unha forma de loita xa case esquecida. Segundo destaca o autor, “a historia de Mario é tamén a historia silenciada dunha parte do país que non se resignou a calar”.
O libro, publicado pola editorial Almuzara, afonda na figura de Langullo dende unha perspectiva humana e social, relatando non só os seus anos na clandestinidade senón tamén o impacto que a súa figura tivo na súa contorna e na memoria colectiva. A través de entrevistas, documentos e testemuños, Alonso constrúe un relato que é ao tempo biografía, crónica e reflexión histórica.
O acto, promovido polo Concello de Manzaneda, busca ser un espazo de encontro e reflexión arredor da memoria democrática, co obxectivo de “manter viva a lembranza de quen loitaron pola liberdade”, segundo afirmou Amable Fernández.