Máis de 40 persoas participaron no I Foro de Emprego Ribeira Sacra
Este xoves celebrouse no Centro do Viño da Ribeira Sacra o I Foro de Emprego Ribeira Sacra, organizado pola Asociación de Empresas Ribeira Sacra Next, coa colaboración de varias entidades sociais do territorio, entre elas Acción contra el Hambre, Igaxes, Albores, Cáritas, Fundación Belarmino Fernández Iglesias e Provivienda.
Este encontro reuniu a máis de 40 persoas, representantes tanto do tecido empresarial como das entidades sociais da zona, co obxectivo de favorecer o diálogo entre a oferta e a demanda de emprego na comarca. O foro abriu un espazo para establecer sinerxias entre ambos sectores, considerado fundamental para abordar os retos laborais locais.
Entre as principais conclusións destacaron dous aspectos clave: a falta de man de obra e a necesidade de relacionar esta cuestión coa vivenda e a formación. Para mellorar o acceso á vivenda, propuxéronse mecanismos que garanten seguridade xurídica tanto para propietarios como para inquilinos. No ámbito da formación, acordouse realizar un mapa das necesidades empresariais e da oferta formativa dispoñible, para reforzar as fortalezas existentes e cubrir os ámbitos con maior demanda.
Ademais, presentouse o novo Portal de Emprego Ribeira Sacra, unha plataforma dixital creada pola Asociación de Empresas Ribeira Sacra Next que pretende facilitar a comunicación entre empresas e persoas en busca de emprego na zona. Esta ferramenta, valorada como pioneira, busca cubrir a ausencia de servizos de intermediación laboral na comarca. Ata o momento, conta cunha trintena de ofertas e xa se rexistraron seis contratacións exitosas.
David Diéguez, xerente da asociación organizadora, destacou que o portal seguirá medrando coa implicación de máis usuarios e empresas, e que a idea é contar cunha persoa dedicada á súa xestión cando a plataforma estea máis consolidada.
O foro contou tamén coa presenza de representantes institucionais como Carmen José López, directora territorial da Consellería de Emprego, Comercio e Emigración en Lugo, e César Blanco, presidente da Confederación Empresarial de Ourense, así como dos representantes das entidades colaboradoras.