Máis de 200 persoas concentráronse en Monforte en solidariedade coa Marcha a Gaza
Máis de 200 persoas participaron este luns na Praza de España de Monforte nunha concentración convocada pola organización Mar de Lumes para denunciar o xenocidio do pobo palestino e amosar o seu apoio e solidariedade coa Marcha a Gaza.
A mobilización en Monforte formou parte dunha acción coordinada que tivo lugar de maneira simultánea en máis de 36 localidades de todo o país. Deste xeito, Galicia sumouse á chamada internacional para romper o bloqueo israelí ao paso de Rafah e permitir a entrada de axuda humanitaria ás persoas atrapadas na Franxa de Gaza.
Durante o acto, as persoas participantes fixeron lectura de comunicados, portaron pancartas en defensa dos dereitos humanos e gardaron momentos de silencio en lembranza das vítimas. A concentración foi tamén unha mostra clara do compromiso do pobo galego coa causa palestina e da denuncia firme contra a política de exterminio e ocupación por parte do Estado de Israel.
Desde Mar de Lumes destacaron a importancia de continuar mobilizadas e organizadas “ante unha situación que vulnera de xeito flagrante o dereito internacional e a dignidade humana”.