Licitadas as obras de mellora nun dos tramos Ourense-Monforte de Lemos
![tramo tren ourense monforte](https://ribeirasacraxa.com/wp-content/uploads/2021/02/tramo-tren-ourense-monforte.jpg)
Adif aprobou a licitación dun contrato para o tratamento de elementos de infraestrutura (pontes, túneles e trincheiras) en aproximadamente 10 km do tramo Ourense-Monforte de Lemos.
O contrato comprende o tratamento de sete pontes, un túnel e nove trincheiras entre os puntos quilométricos 036/524 e 046/229 da liña Monforte de Lemos-Vigo, entre Barra de Miño e Ourense, cun orzamento de licitación de 5.761.092 € (IVE incluído). Tamén se mellorará a drenaxe da infraestrutura, mediante a construción de novos elementos de drenaxe e a limpeza e adecuación dos xa existentes.
Estes traballos, cun prazo previsto de 10 meses, forman parte dos proxectos de modernización do corredor ferroviario Ourense-Monforte de Lemos-Lugo e perseguen unha dobre finalidade: mellorar o estado da infraestrutura e aumentar a fiabilidade das liñas e a calidade do servizo. Ademais, servirán para adaptar os elementos obxecto deste contrato ás novas condicións de explotación que traerán consigo as actuacións de mellora previstas neste tramo.
Esta actuación contribúe á consecución do Obxectivo de Desenvolvemento Sostible ( ODS) 9 (Industria, Innovación e Infraestrutura), que ten entre as súas metas o desenvolvemento de infraestruturas fiables, sostibles, resilientes e de calidade.
Melloras no traxecto Ourense-Monforte de Lemos-Lugo
As actuacións de mellora do tramo en servizo Ourense-Monforte de Lemos-Lugo teñen como obxectivo cumprir os compromisos de Adif coa optimización das condicións de explotación comercial do traxecto, en parámetros tales como a fiabilidade, o confort e os tempos de viaxe.
Os traballos previstos inclúen a modernización e adecuación das instalacións existentes, así como a electrificación a 25 kV en corrente alterna do corredor, adaptando a electrificación existente no tramo Ourense-Monforte de Lemos e dotando de catenaria e instalacións eléctricas ao tramo Monforte de Lemos-Lugo.
A primeira destas melloras, a variante da Pobra de San Xiao, entre Monforte de Lemos e Lugo, xa está en servizo desde abril de 2018. Entre os principais beneficios deste novo trazado, duns 7 quilómetros de lonxitude, destaca a supresión dos 14 pasos a nivel do anterior traxecto, co consecuente aumento da seguridade ferroviaria, viaria e peonil, así como o incremento da velocidade de paso dos trens ata o 160 km/ h.
Fondos europeos
Esta actuación poderá ser cofinanciada polo Mecanismo “Conectar Europa” da Unión Europea ( CEF).