A Mesa de Coordinación para a atención ás vítimas de violencia de xénero na Comarca de Lemos reuniuse en Monforte
O salón de actos do Centro Cívico Social foi este xoves escenario dunha nova reunión da Mesa de Coordinación para a mellora da atención ás vítimas de violencia de xénero na Comarca de Lemos. Este órgano, creado no ano 2009 pola Concellería de Muller e Igualdade a través do Centro de Información á Muller, ten como obxectivo impulsar accións preventivas e garantir unha atención de calidade ás vítimas.
A Mesa está integrada por profesionais de diferentes ámbitos presentes na comarca, entre eles o Social, Educativo, Sanitario, Corpos e Forzas de Seguridade do Estado, Administración de Xustiza e Colexio de Avogados de Lugo. A coordinación entre todas estas áreas, explican dende o organismo, considérase fundamental, xa que a resposta ante a violencia de xénero debe ser “global e integral”, algo que só é viable mediante a colaboración estreita entre os distintos servizos.
Como é habitual, a sesión iniciou cunha parte formativa coa a charla titulada “Violencia de xénero dixital: Aproximación práctica”, que estivo impartida por Estefanía Fernández Otero, médica especialista en medicina familiar e comunitaria e sexóloga experta en prevención dos efectos da pornografía na saúde afectivo-sexual.
Tras a formación, os representantes dos distintos ámbitos continuaron o traballo interno da Mesa, centrado na análise e mellora da atención integral que require a problemática da violencia de xénero.