Joseba Iraola gaña o Campionato de España de Montaña durante a 49ª Subida a Chantada
![Subida a Chantada 2023 1](https://ribeirasacraxa.com/wp-content/uploads/2023/07/Subida-a-Chantada-2023-1.jpg)
A 49 edición da Subida a Chantada deixou como máximos expoñentes ao italiano Christian Merli, que foi o máis rápido, mentres que Joseba Iraola venceu no Campionato de España de Montaña.
A pesar de que Merli foi o máis rápido e bateu un récord co seu coche Osella FA30 de 1:38:527 na carreira sabatina, a súa barqueta non puntúa a nivel nacional, ao tratarse dun vehículo doutra normativa; polo que o vasco Joseba Iraola, que tamén bateu o seu propio récord parando a célula en 1:40:182 co seu Nova M20FC, gañou o Campionato de España.
Mentres, a terceira posición provisional da xeral foi para o alemán Alexander Hin cunha Osella FA30 e que marcou 1:46:372, pero o seu vehículo tampouco puntuou no nacional, ao tratarse de vehículos doutra normativa.
Categorías
Na categoría dos vehículos carrozados, o Porsche 911 GT3R do catalán Jordi Gaig impúxose ao Ford Festa do andorrano Gerard da Casa, sendo terceiro en liza o galego José Antonio Alonso Liste co Ginetta G50.
O apartado do CEM, que acolle aos grandes vehículos de Montaña, deixaba claro o excelente ritmo de carreira que ten o vasco Joseba Iraola e asinaba unha clara vitoria coa súa Nova M20FC sobre o galego Jacobo Senín que in extremis superaba na última manga ao británico Robert Dwane cun Silver Car CS.
Javi Villa impuxo o BRC B59 na Categoría III, cun Édgar Montella que rematou segundo con Speedcar GTR mentres terceiro remataba Benito Pérez Llende e o seu BRC B49.
No apartado dos pilotos do certame autonómico, o novo piloto de autocrós, Miguel Gayoso, fíxose co triunfo por diante de Martín Villar, facéndoo cunha vetusta barqueta Dicode ante o BRC 05 Evo de Villar. A terceira posición foi para José Antonio de Arriba cun Speed Car.
E, nos carrozados do autonómico, os turismos, foi Sergio Vallejo o que impuxo o seu Porsche 911 GT3 ante o Peugeot 306 Maxi de Manuel Senra, sendo terceiro Antonio Pérez Orozco cun Peugeot 308 TCR.