Isabel Rodríguez copresidiu a Xunta Local de Seguridade de Quiroga con motivo da Feira do Viño
A subdelegada do Goberno en Lugo, Isabel Rodríguez, copresidiu xunto co alcalde de Quiroga, José Luis Rivera, a Xunta Local de Seguridade do municipio, coordinando o dispositivo que se artellará para a XLII Feira do Viño e XXIV Mostra do Aceite dos próximos 30 e 31 de marzo. Á reunión asistiron tamén responsables de Seguridade do Concello, Garda Civil, Policía Nacional e Policía Local.
A subdelegada celebrou a continuidade desta cita enolóxica e gastronómica “que pon no mapa as adegas da Ribeira Sacra cada sábado e domingo de Pascua desde hai máis de corenta anos”. Afirmou que “a calidade vitivinícola desta comarca fará que a feira sexa todo un éxito un ano máis”.
Neste senso, ofreceu ao rexedor os medios necesarios para que transcorra garantindo a máxima seguridade dos asistentes e agradeceu a disposición e traballo dos corpos e forzas de seguridade.
Feira do Viño
O Concello de Quiroga organiza os días 30 e 31 de marzo a XLII Feira do Viño, unha das citas vitivinícolas máis importantes da provincia, así como a Mostra do Aceite, que conta xa con 23 edicións.
Neste certame de exaltación dos viños da comarca elaborados de forma artesanal contará coa participación de 14 adegas: Alma das Donas, Algueira, Atrium Vitis, EDV Viticultores, Alvaredos – Hobbs, Lar de Ricobao, Ponte da Boga, Rectoral de Amandi, Casa de Outeiro, Val de Quiroga, Adega Gullufre, Pazo de la Cuesta e Adamare Wines, ademais da adega convidada que este ano vén desde a DO Valderooras: Alan de Val.
Os postos de venda e a mostra ofrecerán todo tipo de produtos da zona, como mel, aceite, augardente, licores, castañas, etc., e haberá un amplo programa de actividades que combina deporte, exposicións, música e gastronomía.