Invístense máis de 180.000 euros na mellora dos servizos en Ribas de Sil
O Presidente da Deputación de Lugo, José Tomé Roca, asinou co alcalde Ribas de Sil, Miguel Ángel Sotuela, que ven de anunciar a súa renuncia ao cargo, un acordo de colaboración a través do cal a institución provincial financia cunha achega de 118.000 euros para desenvolver un conxunto de actuacións que mellorarán os servizos e dotacións públicas deste municipio. Os proxectos teñen un orzamento total de 182.211,71 euros, dos que o Concello achega a cantidade restante.
En concreto, vaise facer a instalación eléctrica do cámping, a optimización enerxética das instalacións do alumeado público, adquirir programadores astronómicos para o alumeado público e farase un conxunto de melloras na casa consistorial.
Así mesmo, pavimentaranse os camiños na Cabarca e Piñeira, e mellorarase o camiño de Filgueiro aos Vilares. Tamén se vai adquirir un compresor para a ETAP, unha rozadoira lateral para a prevención de lumes forestais e un remolque plataforma para o transporte de maquinaria. Ademais de adquirir dúas parcelas no termo municipal de Ribas de Sil.
O mandatario provincial encadrou esta colaboración na función da Deputación como Concello dos Concellos, e destacou que “son actuacións que municipios pequenos coma Ribas de Sil por si sós non poden asumir, dende a institución provincial buscamos garantir que poidan acceder a recursos e oportunidades para mellorar a calidade de vida dos seus veciños e veciñas. Ademais, o alcalde agradeceu este apoio, sinalando que este proxecto supón un avance significativo para o seu concello.