Inaugurada a Bienal de pintura do Eixo Atlántico, que visitará no verán Vilalba e Monforte
A XV Bienal de Pintura do Eixo Atlántico foi inaugurada este 27 de novembro en Viana do Castelo, nun acto que reuniu autoridades da Eurorrexión e os artistas finalistas do certame. A mostra poderá visitarse no Museu de Artes Decorativas ata finais de xaneiro, no marco da Capital da Cultura do Eixo Atlántico 2025.
Durante o acto inaugural anunciáronse as obras gañadoras, seleccionadas entre as 28 pezas finalistas desta edición, marcada pola elevada calidade técnica, a diversidade estética e a innovación conceptual.
O evento contou coa presenza do secretario xeral do Eixo Atlántico, Xoán Vázquez Mao; do vicepresidente do Eixo Atlántico e alcalde de Viana do Castelo, Luís Nobre; de Vítor Dias, Diretor Regional do Norte do IPDJ; de Sara Pérez Bello, representante da Xunta de Galicia no xurado; e de Patricia Oliveira, membro do xurado en representación do IPDJ.
As obras premiadas na XV Bienal de Pintura do Eixo Atlántico xa teñen nome. O Primeiro Premio recaeu en A liberdade de ser, unha creación realizada con acrílico e spray de alta temperatura sobre paneis de luz LED e MDF, asinada por Acácio Viegas, artista nacido en Viana do Castelo en 1976. O Segundo Premio foi para Rompiendo límites, unha obra bidimensional elaborada con pintura acrílica sobre táboa polo sarriano Javier Pena, nado en 1947.
Pola súa parte, o Premio Novos Talentos Luso-Galaicos distinguiu O que vi, un óleo sobre tea do mozo creador Afonso António, natural de Lousada e nacido en 2004.
A artista multidisciplinar Gosia Trebacz (Cracovia, 1971), con máis de trinta anos de traxectoria en Galicia e unha sólida presenza internacional, presidiu o xurado desta XV edición. Completaron o panel avaliador Sara Pérez Bello (Xunta de Galicia), Patricia Oliveira (IPDJ), João Ribeiro da Silva e Tito Senna, gañador da edición anterior.
Trebacz salientou que a Bienal é “un trampolín para que artistas emerxentes e consolidados amosen as súas obras na nosa preciosa esquina atlántica, fomentando a creatividade, o intercambio e o diálogo entre Galicia e o Norte de Portugal.”
Creada en 1997, a Bienal de Pintura do Eixo Atlántico consolidouse como un referente cultural transfronteirizo, impulsando a creación artística e a cooperación entre Galicia e o Norte de Portugal.
A XV edición conta coa colaboración da Xunta de Galicia, da Comissão de Coordenação e Desenvolvimento Regional do Norte, I.P., e do Instituto Português do Desporto e Juventude, I.P.
Tras a súa estancia en Viana do Castelo, a exposición viaxará ao longo de 2026 por diferentes municipios do Eixo Atlántico. En xuño esetará en Vilalba e en setembro en Monforte de Lemos.