Gonzalo Caballero continúa en Monforte cos encontros coa militancia
Gonzalo Caballero prosegue os seus encontros coa militancia socialista con sendos actos en Noia e Monforte.
“Cada día atopo máis ilusión entre os compañeiros e as compañeiras. Cada día somos máis os e as que queremos seguir avanzando pola esquerda e non retroceder”, destacou Gonzalo Caballero.
Nese senso, subliñou o aumento da mobilización a medida que pasan os días. “Hai unha mobilización crecente da militancia socialista para apostar polo único proxecto gañador contra a dereita”, recalcou, consciente de que “cada día máis militantes” se están activando e “cargando as pilas” de cara ao 30 de outubro.
E é que, como dixo Gonzalo Caballero, o que el encabeza é “un proxecto para gañar dentro, coa militancia, e gañar fóra, coa cidadanía”.
De feito, asegurou que “eu sempre salto ao campo para gañar o partido” e, seguindo co símil futbolístico, evidenciou que “outros saen a meter goles en propia”.
Por iso, Gonzalo Caballero pediu o apoio maioritario da militancia socialista de cara ás primarias do vindeiro día 30. “Todos os votos valen o mesmo e xogámonos seguir avanzando coa militancia e pola esquerda ou retroceder”, finalizou.