Folgoso do Courel acolleu a presentación do documental ‘O Son da Serra’ sobre o incendio de 2022
Este sábado tivo lugar en Folgoso do Courel a presentación da longametraxe documental ‘O Son da Serra, Cando O Courel derramou bágoas de cinsa’, unha obra que reconstrúe o incendio que arrasou a serra no verán de 2022 a través das voces das persoas que o viviron en primeira liña.
O documental afonda no que supuxo aquel incendio, considerado a entrada en Galicia dos lumes convectivos de sexta xeración. Durante dúas semanas queimáronse case 13.000 hectáreas nos concellos de Folgoso do Courel, A Pobra do Brollón e Quiroga, e máis dun milleiro de persoas tiveron que abandonar as súas casas. Foi o maior incendio rexistrado en Galicia ata que outro lume, no verán de 2025, superou a súa superficie.
A peza reúne testemuños de veciñas e veciños, representantes municipais e membros do dispositivo de extinción da Dirección Xeral de Defensa do Monte, que tamén achegaron imaxes fundamentais para reconstruír o sucedido. As entrevistas iniciáronse cando o incendio nin sequera estaba extinguido, nun contexto no que o medo e a tensión seguían moi presentes, e continuaron recolléndose ata comezos de 2025.
Segundo explican as persoas responsables, ‘O Son da Serra’ quere servir ao mesmo tempo como memoria e como homenaxe: unha maneira de poñer en valor o territorio e a súa xente, e de recoñecer o esforzo das persoas que defenderon a serra e que sufriron directamente o impacto do lume.
A obra é resultado da colaboración do fotógrafo Emilio Romanos Castiñeira con Némesis Audiovisual, baixo a dirección de Ana Belén Fernández Fernández e Paulino Rodríguez Fierro Cadórniga, e coa música orixinal de Ale González. A presentación deste fin de semana estivo dirixida especialmente ás persoas afectadas polo incendio, nun acto no que se lles devolveu parte do que elas mesmas compartiran nos momentos máis duros.
O equipo responsable do filme lembrou que comezou a gravación na noite do 17 de xullo, cando o lume aínda avanzaba con forza. Chegaron á zona no momento máis crítico, apenas uns días despois de iniciarse o incendio, nunha xornada na que o comportamento das lapas superou todo o coñecido ata o momento en Galicia.
O proxecto busca deixar constancia documental dun territorio de gran valor ambiental e cultural, sensibilizar tanto á veciñanza como ao conxunto da cidadanía sobre a importancia da súa conservación, e informar sobre a natureza destes lumes, promovendo unha maior formación, prevención e coordinación entre a poboación e os servizos de extinción.