Extinguido o lume de Folgoso do Courel, con 300 hectáreas calcinadas
![folgoso courel incendio forestal lume](https://ribeirasacraxa.com/wp-content/uploads/2021/04/folgoso-courel-incendio-forestal-lume.jpg)
O incendio forestal que nos últimos días afectou ao concello de Folgoso do Courel quedou extinguido a última hora da tarde deste venres, despois de calcinar preto de 300 hectáreas.
O lume iniciárase na madrugada do xoves na parroquia de Meiraos, e durante a xornada chegouse a activar o nivel 2 como medida preventiva pola proximidade das lapas ao lugar de Portela, na parroquia de Gundriz, en Samos. No lugar traballaron 11 axentes, 27 brigadas, 13 motobombas, 2 pas, 6 helicópteros e 4 avións.
Despois de conseguir controlar o incendio, sobre as 20.00 horas do xoves, medios terrestres seguiron a traballar na zona afectada para evitar que se reproducisen as lapas, algo ao que tamén contribuíu a chuvia caída durante a xornada.
Segundo as últimas estimacións, a superficie total afectada foi de 299,85 hectáreas, das cales 105 foron arboradas e 194,85 de monte raso.
Medio Rural lembra que está a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais poderá ser consultada na conta aberta de Twitter: @incendios085.