O Concello de Chantada aumenta a capacidade do Punto Limpo
O Concello de Chantada, desde a concellaría de Medio Ambiente, aumenta a capacidade e a seguridade no Punto Limpo municipal coa adquisición de novos colectores de grandes volumes e con melloras na iluminación e na cuberta.
Desde o ano 2022, o Concello acomete melloras nestas instalacións a través de axudas a entidades locais de Galicia para financiar actuacións en materia de recollida de residuos especiais de competencia municipal, cofinanciadas polo fondo europeo do Mecanismo de Recuperación e Resiliencia financiado pola Unión Europea–Next Generation UE.
Neste caso, as actuacións contaron cun investimento de case 50.000 euros, dos que o Concello achega o 10%, co que se adquiriron novos colectores de grandes volumes de 30 m³ e 15 m³, aumentouse a seguridade mediante iluminación e instalouse unha zona cuberta de 12x3 metros onde se habilitou un espazo de reciclaxe circular con aparellos e outro tipo de material que pode ser recuperado e/ou reutilizado por outras persoas.
Este tipo de melloras, explican desde o Goberno municipal, teñen como obxectivo ofrecer todos os servizos de reciclaxe en todo o municipio e informar dos procedementos a seguir mediante campañas informativas como as que se desenvolven nas aulas e a pé de rúa.
Respecto ao Punto Limpo, o alcalde, Manuel Lorenzo Varela, explica que as instalacións contan cun lugar específico para depositar elementos en bo estado que poidan ser reutilizados polos veciños. “Os elementos que estean en boas condicións colocaranse neste stand para que a xente que queira lles poida dar unha nova vida. Lámparas, libros, móbiles, cadeiras, aparellos electrónicos… entregaranse e recolleranse aquí de maneira gratuíta, seguindo un rexistro de quen o entrega e quen o leva”, sinala o rexedor.
Por outra banda, a través da liña 3 da subvención para puntos limpos móbiles e cun investimento de 48.400 euros, o Concello de Chantada adquiriu un vehículo eléctrico para o departamento de Medio Ambiente. Trátase dun vehículo para o transporte dos puntos limpos móbiles que se desprazan polas parroquias cada quince días para recoller enseres. Este novo servizo amplía e mellora a recollida de residuos nas aldeas e nos dous puntos de proximidade da vila.