EDP lanza a quinta edición da iniciativa de apoio a emprendedores Entama
![muller ordenador dixital oficina emprego](https://ribeirasacraxa.com/wp-content/uploads/2022/09/muller-ordenador-dixital-oficina-emprego.jpg)
Potenciará especialmente os proxectos liderados por mulleres ou con elevado potencial de empregabilidade para as mesmas.
EDP abriu o prazo para presentar candidaturas a unha nova edición do programa de apoio a emprendedores locais, Entama. Nesta quinta edición, esta iniciativa seguirá creando riqueza e emprego nos municipios nos que a compañía enerxética ten actividade. Entama promove a igualdade de oportunidades e a inclusión, así como a mellora ambiental, e é unha ferramenta de compromiso coa comunidade local a través do fomento do desenvolvemento do municipio e a loita contra o despoboamento rural.
Entama segue crecendo ano a ano, e nesta edición 2023-2024 manterase o apoio a proxectos tractores do territorio en Asturias, Cantabria, Lugo, Córdoba (Valle do Guadiato) e Cádiz (Los Barrios), promovendo a empregabilidade e a fixación de poboación en áreas en risco de despoboamento. Cada proxecto seleccionado poderá recibir ata 20.000 euros.
Como feito diferencial, poñerá especial énfase en proxectos liderados por mulleres e con potencial de empregabilidade feminina, como unha das demandas recollidas pola compañía, claramente comprometida coa igualdade e equidade.
O prazo de presentación de candidaturas alongarase ata o próximo 7 de setembro e o prazo de selección de proxectos finalizará o 20 de outubro. O xurado primará a súa viabilidade, sustentabilidade e impacto no territorio e dará a coñecer os resultados o 24 de novembro, para desenvolver os proxectos ao longo de 2024.
En Lugo, teranse en conta proxectos na Mariña, Comarca de Lugo, Terra Chá e da zona da Montaña Lucense.
As bases atópanse dispoñibles na web corporativa de EDP España e na propia web de Entama. Nesta última web creouse unha área privada desde onde todos os candidatos poderán cargar as súas propostas e onde existirá unha área para xerar sinerxias entre os “entamadores”, para que poidan facer crecer os seus proxectos a través de alianzas.
Ata a data, o programa apoiou máis de 40 proxectos en Asturias, Cantabria, Cádiz (Los Barrios) e Córdoba (Valle do Guadiato). Desde as súas orixes alcanzouse un investimento acumulado que ascende a 450.000 euros.
Entama é o proxecto de maior impacto de EDP nas súas comunidades locais, o que fixo que Pacto Mundial de Nacións Unidas outorgáselle un premio pola súa achega ao ODS 11 de “Comunidades Sostibles”. En anteriores edicións, Entama xa axudou á posta en marcha dun tren turístico impulsado por un tractor de baixas emisións para acceder ao refuxio de Brañagallones, no Parque Natural de Redes, en Asturias; ao desenvolvemento dun proxecto micolóxico nunhas antigas instalacións mineiras, en Cádiz; á creación dun novo concepto de ximnasio nun municipio rural, en Córdoba, e ao desenvolvemento dunha plataforma dixital para a compravenda de gando, entre outros.
Este programa enmárcase nas dimensións ESG (Ambiental, Social e de Bo Goberno Corporativo) que rexen o Plan de Negocio 2023-2026 do Grupo EDP, polo que a compañía investirá 25.000 millóns de euros para acelerar a transición enerxética, a través do despregamento de máis enerxías renovables, de dotar de maior flexibilidade ao sistema eléctrico e do deseño se solucións innovadoras e sostibles para os seus clientes.