Declaran deserto o proceso de selección de 3 policías locais en Monforte e anuncian nova convocatoria
RibeiraSacraXa
A xunta de goberno anunciouno despois de que ningún dos aspirantes que superaron a proba teórica conseguise aprobar a práctica
10 Mar 2021
O Concello de Monforte, nunha sesión extraordinaria da xunta de goberno local celebrada esta mañá, vén de declarar deserto o procedemento selectivo para cubrir 3 prazas da Policía Local, despois de que ningún dos aspirantes que superaron a proba teórica conseguise aprobar a parte práctica, das probas físicas.
Na xuntanza deste mércores decidiuse ademais aprobar a convocatoria dun novo proceso selectivo para a provisión das prazas vacantes da Policía Local. As bases que rexerán a nova convocatoria serán exactamente as mesmas que no proceso celebrado anteriormente, que segundo lembran desde o Concello, foran "informadas favorablemente pola Dirección Xeral de Emerxencias e Interior da Consellería de Vicepresidencia da Xunta de Galicia". Así pois, o novo procedemento de selección rexerase polas mesmas bases e nas mesmas condicións que na anterior convocatoria.
O Concello adiantou que a convocatoria se publicará nos vindeiros días no Boletín Oficial da Provincia (BOP) e o prazo para a presentación das solicitudes abrirase unha vez que sexa publicada no Boletín Oficial do Estado (BOE).
UN PROCESO POLÉMICO
O proceso selectivo para cubrir as vacantes na Policía Local de Monforte desenvolvérase xa no medio da polémica, ao coincidir a primeira das probas, fixadas polo Concello para o pasado 26 de febreiro, co exame convocado previamente pola Academia Galega de Seguridade Pública (AGASP).
A coincidencia impedía aos aspirantes presentarse ás dúas convocatorias e propiciou que, dos 301 inscritos nas probas de Monforte, soamente 14 asistisen finalmente.