Coureleando organiza unha nova ruta pola contorna natural de Monforte de Lemos
Este sábado 20 de decembro, Coureleando organiza unha ruta para coñecer un dos espazos menos explorados do Concello de Monforte de Lemos. A poucos quilómetros do centro urbano, os participantes poderán percorrer unha contorna natural que conserva elementos históricos e paisaxísticos, como enormes érbedos, sobreiras monumentais, viñas en ruínas e lugares con lendas locais, entre eles a sepultura antropomorfa coñecida como a Pena dos Defuntos.
A actividade, denominada Ruta do Santo Baño e a Pena dos Defuntos, é un percorrido circular de baixa dificultade cunha lonxitude aproximada de 5 quilómetros e un desnivel positivo de 254 metros. A camiñada, que durará unhas tres horas e media, transcorre maiormente por pistas anchas e un tramo curto de sendeiro, seguindo antigos camiños que usaban os peregrinos no seu camiño cara a Santiago de Compostela. Ademais, ofrece a oportunidade de gozar da paisaxe formada por bancais de viñas rodeados pola natureza local.
O punto de encontro será na entrada do aparcadoiro do Parque dos Condes, en Monforte. A inscrición ten un custo de 20 euros por persoa e está limitada a 10 prazas. Para reservar, os interesados deben enviar unha mensaxe por WhatsApp ao número 626 64 30 21.
Dende Coureleando recomendan levar calzado de montaña cómodo e impermeable, roupa adecuada á meteoroloxía, ademais de paraugas e paus para facilitar a camiñada. Tamén é recomendable levar auga nunha mochila.
A ruta estará guiada por Guillermo Díaz Aira, técnico deportivo especializado en media montaña.