Coureleando organiza dúas rutas polo Courel para este domingo
Coureleando organiza para este domingo, 15 de xuño, dúas novas rutas pola contorna da Serra do Courel. Serán percorridos de dificultade media/baixa, co obxectivo de que poidan participar persoas de todas as condicións físicas, que poderán gozar das espectaculares paisaxes naturais da zona.
A primeira das rutas será pola mañá e percorrerá Monte Cido e Moreda, nun roteiro de 8 quilómetros que pasará pola escavación do campamento romano do Cido, un campo de dolinas e a arquitectura tradicional de Moreda. Ademais, os participantes poderán descubrir diferentes especies de orquídeas da zona.
A segunda ruta será pola tarde, cun percorrido circular de 2 quilómetros polos Entaladoiros e o Val das Moiras, con interpretación xeolóxica e botánica deste lugar, considerado un dos máis máxicos de Galicia.
Ambos percorridos estarán guiados polo técnico deportivo de media montaña Guillermo Díaz Aira.