Convocado XX Concurso de Deseño de Carteis das Festas Patronais de Monforte de 2025
O alcalde do Concello de Monforte, José Tomé Roca, anunciou a convocatoria do XX Concurso de Deseño de Carteis das Festas Patronais 2025, co obxectivo de escoller o cartel anunciador deste ano. Con esta iniciativa, o Concello inicia a organización das Festas Patronais, que terán lugar no mes de agosto.
As bases do concurso foron aprobadas na Xunta de Goberno do luns 24 de marzo e publicadas na web do Concello. O prazo de presentación de deseños está aberto ata o 5 de maio de 2025.
Requisitos para a presentación de deseños
Os participantes deben presentar obras de creación propia, orixinais e inéditas. A técnica e formato son libres, sempre que permitan a reprodución en cuatricromía. Ademais, o cartel debe incluír o texto: “Monforte de Lemos Festas Patronais do 11 ó 16 de agosto 2025”, coa distribución escollida polo autor.
A entrega dos deseños realizarase persoalmente ou por correo no Rexistro Xeral do Concello de Monforte ata o 5 de maio de 2025.
Por primeira vez, non poderán participar os gañadores das dúas últimas edicións do concurso, co obxectivo de fomentar a diversidade de propostas.
Os deseños non deben levar o nome do autor de maneira visible. Presentaranse nun sobre identificado cun pseudónimo e, noutro sobre pechado, incluiranse os datos persoais do autor: nome, enderezo completo, teléfono e correo electrónico.
Premios
O cartel elixido será a imaxe anunciadora das Festas Patronais e portada do programa, cun premio de 1.000 euros (impostos incluídos). A obra premiada quedará en poder do Concello de Monforte, que obterá todos os dereitos de reprodución, distribución e adaptación, sen necesidade de autorización do autor nin dereito a remuneración adicional.
O gañador deberá entregar unha copia dixital do cartel e incluír os logotipos do Concello e, se procede, dos patrocinadores. Ademais, o cartel premiado e unha selección das mellores propostas serán expostos na Casa da Cultura Poeta Lois Pereiro. Unha vez rematada a exposición, os autores poderán recuperar os seus traballos, se o solicitan.
Xurado e criterios de avaliación
A decisión do xurado publicarase o 12 de maio de 2025 e basearase nos seguintes criterios:
- Temática e relación con Monforte e as Festas Patronais (30 puntos)
- Mellor deseño gráfico (30 puntos)
- Tratamento das cores e tipografía (20 puntos)
- Uso de texto e imaxes (20 puntos)
- Calidade técnica e artística (20 puntos)
- Impacto visual e creatividade (20 puntos)
- Orixinalidade do deseño (20 puntos)
O alcalde José Tomé anima a todos os artistas a participar: “Queremos que nos axuden a crear un cartel que represente as nosas Festas Patronais e anime a veciños e visitantes a gozar deste evento fundamental para a nosa sociedade e economía”.