Concelleiros do PP piden a paralización da fonte ornamental do parque dos Condes
Un grupo de concelleiros do Partido Popular de Monforte participou esta mañá nunha mobilización cidadá en contra da obra da nova fonte ornamental que o goberno local impulsa no Parque dos Condes, no centro de Monforte de Lemos.
A voceira popular, Katy Varela, pediu ao alcalde José Tomé que reflexione e deteña o proxecto da chamada fonte-mausoleo, cuxo orzamento rolda os 700.000 euros. Desde o PP consideran que esa contía debería destinarse a mellorar servizos básicos da cidade, especialmente os relacionados co abastecemento e o saneamento, que, segundo denuncian, aínda presentan deficiencias.
Varela afirmou que a actuación responde máis a unha estratexia de imaxe persoal que a unha necesidade real da veciñanza. “O único que pretende é alimentar o seu ego; este proxecto non achega solucións aos problemas de Monforte”, sinalou, ao tempo que cualificou a iniciativa como “a última ocorrencia de Tomé”, criticando tamén o uso de recursos da Deputación de Lugo para financiar parte da intervención.
A representante popular lembrou ademais que o grupo municipal xa solicitara no pleno de novembro a paralización das obras, proposta que foi rexeitada polo goberno local. O principal motivo da oposición é que a construción da fonte suporá, segundo o PP, a eliminación dunha parte da zona verde e da vexetación do parque, un espazo moi frecuentado para o paseo e a práctica deportiva.
Como alternativa, os populares suxiren apostar por actuacións que favorezan un uso máis amplo do entorno. Entre elas, propuxeron a instalación dunha estrutura cuberta que permita aproveitar o espazo durante todo o ano, protexendo aos usuarios da chuvia no inverno e da intensidade do sol no verán.
Katy Varela insistiu en que a cidade precisa investimentos orientados á solución de problemas estruturais e non a proxectos que, ao seu xuízo, teñen un carácter simbólico ou persoalista. Tamén puxo como exemplo a persistencia de vertidos ao río nas proximidades da zona, unha situación que, segundo denunciou, leva anos sen resolverse.
Finalmente, a voceira popular concluíu que o proxecto da fonte responde a “obras que levan o nome de Tomé en lugar de atender as verdadeiras prioridades dos monfortinos”.