Comezan os traballos de acondicionamento en Bustelo de Fisteus
Comezaron os traballos de acondicionamento dos terreos do núcleo de Bustelo de Fisteus, recentemente declarada como Aldea Modelo de Galicia pola Consellería do Medio Rural.
Esta é a décimo cuarta aldea modelo de Galicia e vai contar coa inminente actuación de recuperación da terra agraria. E tamén a publicación, nas próximas semanas, da concorrencia competitiva para atopar un xestor como anunciou a Directora Xeral de Desenvolvemento Rural, Inés Santé. A primeira actuación nunha aldea modelo - como afirmou- é recuperar a terra agraria da contorna do núcleo cunha dobre finalidade: por un lado poñela a producir e por outro facer unha xestión activa da biomasa previndo os incendios forestais.
En palabras da directora xeral “os propietarios e veciños da aldea pasan de ter que limpar ou xestionar as súas parcelas ou pagar para que o fagan a ter unha renda derivada desa actividade económica”. “A boa vontade dos propietarios é algo fundamental” segundo Inés Santé, quen destacou que foi o lugar no que recolleron no menor tempo a sinatura dos veciños que se precisaba, un mínimo do 70% dos propietarios, para poñer en marcha este proxecto.
O alcalde de Quiroga, Julio Álvarez agarda que con este proxecto Bustelo de Fisteus non só recupere os seus terreos de cultivo, se non que poida recuperar as súas vivendas e ter un futuro prometedor”. A arquitectura do núcleo, a súa situación xeográfica, enmarcada entre unha alvariza totalmente rehabilitada e o miradoiro dende o que se contempla todo o val do río Quiroga, onde rematou a visita; fan que este lugar poida chegar a ser en palabras do rexedor local, “un punto turístico referente no Xeoparque Montañas do Courel”.