Comezan as xornadas 'O futuro das persoas viticultoras na Ribeira Sacra' no sur de Lugo
As xornadas e ciclos de conferencias 'O futuro das persoas viticultoras na Ribeira Sacra' comezan hoxe, o 29 de agosto e rematan o 6 de setembro en diferentes concellos da Denominación de Orixe Ribeira Sacra.
O Sindicato Labrego Galego–Comisións Labregas (SLG-CCLL), en colaboración coa Vicepresidencia da Deputación de Lugo, oganizan estes espazos de diálogo co sector vitivinícola para analizar a vendima de 2025 e debater sobre os retos e oportunidades de futuro.
Durante os encontros falarase da situación da vendima deste ano 2025 e da Denominación de Orixe Ribeira Sacra.
As citas programadas desenvolveranse en diferentes concellos da comarca ao longo dos próximos días. O venres 29 de agosto ás 19:00 horas terá lugar un encontro na Casa da Cultura de Quiroga, mentres que o sábado 30 de agosto ás 12:00 horas a actividade desprazarase ao local do Sindicato Labrego Galego en Chantada. Xa en setembro, o mércores día 3 ás 19:00 horas celebrarase unha sesión na Casa da Cultura de Pantón, e o xoves 4 á mesma hora repetirase escenario na Casa da Cultura de Sober. O venres 5 de setembro ás 12:00 horas a cita será no Centro do Viño da Ribeira Sacra, en Monforte de Lemos, onde está prevista unha conferencia sobre a Lei da Cadea Alimentaria a cargo de Orlando Vázquez Yáñez, xefe do Servizo da Cadea Alimentaria e Control de Prácticas Comerciais Desleais da Consellería do Medio Rural. Finalmente, o sábado 6 de setembro ás 12:00 horas o ciclo de encontros pecharase na Casa da Cultura de Taboada.
Con esta programación, o Sindicato Labrego Galego busca reforzar a información e o debate arredor da viticultura na Ribeira Sacra, fomentando a participación activa das persoas produtoras e a colaboración coas administracións.