Comezan as obras para o arranxo do acceso ao despegue de parapente en Quiroga
Deron comezo os traballos de arranxo da pista de acceso aos miradoiros turísticos de Vilañán. Trátase dunha pista de preto de 4 quilómetros que une o núcleo de Vilañán co despegue de parapente e o miradoiro.
A Dirección Xeral de Turismo aporta 36.000 euros para as intervencións que consisten en traballos de motoniveladora, realización de cunetas e pasos de auga e na colocación de grava compactada nalgúns tramos da pista.
Na zona do miradoiro xa se comezou a colocar e compactar a grava.
A pista de despegue de parapente é recoñecido polos aficionados a este deporte como unha das mellores polas súas térmicas, nesta realizaranse labores de roza e fresado. Tamén está prevista a semente de especies herbáceas nunha zona duns 400 m²...
Ademais desta obra, estase a espera de que se comunique o inicio do arranxo do Miradoiro de Vilañán. A intervención no miradoiro complementará o traballo iniciado polos veciños deste núcleo.
Co acondicionamento da pista do despegue de parapente, do miradoiro de Vilañán e dunha rúa no núcleo dos Novais para o que se conta cunha achega do plan HURBE da Dirección Xeral de Urbanismo son máis de 120.000 euros os que inviste o Concello de Quiroga de cara ao turismo do municipio e do Xeoparque Montañas do Courel.