Comezan as actividades organizadas polo Xeoparque de Montañas do Courel pola Semana de Xeoparques Europeos
Para celebrar a Semana de Xeoparques Europeos 2023, o Xeoparque de Montañas do Courel, que integra os concellos de Ribas de Sil, Folgoso do Courel e Quiroga; promove actividades desde mañá, 1 de xuño, ata o vindeiro día 11 incluído.
Así, o 1 de xuño terá lugar o III Encontro dos Xeopícaros das Montañas do Courel que terá lugar entre as 11.00 horas e as 14.00 hotas na praia fluvial de San Clodio de Ribas de Sil.
Xa o sábado, 3 de xuño, haberá tres actividades: unha conferencia baixo o título 'Tras as pegadas dos trilobites do soldón' na casa da cultura de Quiroga ás 11.00 horas; unha ruta que sairá ás 12.00 horas desde a casa da cultura de Quiroga co mesmo nome que a conferencia; e rematará o día co concerto de Jazz and Blues no Souto de Miraz ás 20.30 horas no marco do CourelSon.
Pola súa parte, o domingo 4 de xuño hai organizada a Ruta dos Castros, que percorrerá Castro de Vilar, Vilamor, Sobredo e Cido a partir das 10.00 horas e as persoas que participen terán que quedar no Bar o Mirador de Folgoso do Courel.
O día 6 de xuño terá lugar un webinar 'Las cuevas y el Karst, un viaje a través de los geoparques españoles' ás 18.00 horas e o 8 de xuño presentarase de forma didáctica e musicada o libro infantil 'O oso cariñoso' no CPI Uxío Novoneyra, no CEIP San Clodio e no CEIP Quiroga.
Máis actividades
O 10 de xuño está organiza unha ruta pola Cubela, cuxo punto de encontro será a praia fluvial de San Clodio, en Ribas de Sil, ás 10.00 horas. Ese mesmo día, inaugurarase o Centro de Interpretación Río Sil en Torbeo ás 13.00 horas.
Xa o 11 de xuño, como último día destas actividades, terá lugar a XIX Festa da Cereixa, do Viño e do Aceite de Ribas de Sil, que se celebrará todo o día. Mentres, haberá actividades complementarias: Manuel Cao presentará o seu libro 'Historias do sur do xeoparque, vivencias e San Clodio' ás 17.00 horas no Concello de Ribas de Sil; á mesma hora comezará unha ruta das orquídeas en Seoane do Courel e tamén haberá actividades de iniciación ao barranquismo.