Clausurado o obradoiro dual de emprego Serra do Faro VIII
O delegado territorial da Xunta en Lugo, Javier Arias, participou este luns na entrega de diplomas ao alumnado que se formou durante o último ano no obradoiro dual de emprego Serra do Faro VIII, promovido polo Concello de Chantada asociado cos de Carballedo e Taboada.
Arias destacou que acaba de comezar un novo taller que toma o relevo do anterior, tamén financiado pola Consellería de Emprego, Comercio e Emigración, que inviste algo máis dun millón de euros en ambas iniciativas
O delegado subliñou que os dous obradoiros que se suceden “ofrecen oportunidades a un total de 40 persoas desempregadas en especialidades relacionadas coa construción, a xardinería e a atención sociosanitaria, que presentan unha elevada demanda no mercado laboral”. Ademais, garanten a continuidade dos traballos de mellora de espazos públicos que acometen como parte da aprendizaxe práctica das persoas alumnas traballadoras.
En canto ás actuacións que realizará o novo taller, en Carballedo centraranse na rehabilitación da casa reitoral de Santa Cristina de Asma e o mantemento da contorna. En Chantada executarán unha zona de plataforma única no parque Eloísa Rivadulla e acondicionarán miradoiros no paseo fluvial. Polo que respecta a Taboada, acondicionarán un vial en Pacios.
Así mesmo, realizarán numerosos traballos de conservación de xardíns e zonas verdes e creación de novos espazos destas características nos tres municipios. En canto ao alumnado de atención sociosanitaria a persoas dependentes en institucións, realizarán as súas prácticas no fogar residencial e centro de día da Barrela.