Chegan novidades do festival As Cores do Outono
![a pobra do brollon (1)](https://ribeirasacraxa.com/wp-content/uploads/2021/10/a-pobra-do-brollon-1.jpg)
Xa están publicadas as medidas de seguridade do festival As Cores do Outono, que se levará a cabo na Pobra do Brollón esta fin de semana -16 e 17 de outubro-. Será unha edición completa con diferentes eventos relacionadas coa poesía, o baile, o teatro, a maxia e, por suposto, a música.
En primeiro lugar, todas as persoas que accedan ao recinto deberán ser identificadas. Así mesmo, todos os participantes poderán circular polo recinto nas distintas áreas respectando a normativa. Haberá tres áreas.
Por unha beira, estará a área de baile na que non se pode acceder con bebida nin con comida. Así mesmo, é obrigatorio o emprego de máscara e estará prohibido fumar. No caso da área de consumo, poderase retirar a máscara tan só no momento da consumición e poderase fumar nos lugares indicados e respectando as distancias.
Finalmente, está a área de cadeiras onde se deberá permanecer sentado, mantendo a distancia de seguridade e retirando a máscara tan só no momento de consumición. Así mesmo, tampouco se poderá fumar.
Unhas medidas de seguridade para gozar dun festival seguro á par que ameno. Ademais, a fin de evitar colas e alixeirar o acceso ao recinto, dende a organización pregan reservar previamente no teléfono 650 624 828 (por WhatsApp preferiblemente), tanto para os concertos, como para o resto de programación de As Cores de Outono.
![cartel area recreativa samugueiros pobra brollon](https://ribeirasacraxa.com/wp-content/uploads/thumbs/2021/10/cartel-area-recreativa-samugueiros-pobra-brollon-200x239.jpg)