Charla-coloquio sobre as controversias e tabús na saúde da muller en Chantada
Este sábado terá lugar en Chantada unha nova charla-coloquio sobre as controversias e tabús na saúde da muller.
A Dra. Mariña Sánchez Andrade, especialista en xinecoloxía e obstetricia abordará os temas aos que non sempre é doado ter acceso. Nesta conversa reflexionarase sobre a importancia que teñen para a saúde das mulleres.
A actividade dará comezo ás 18.00 horas no Auditorio Municipal de Chantada.
Desmontando mitos. Controversias e tabús na saúde da muller proporcionará ás asistentes nocións e conceptos básicos para coñecerse máis a unha mesma. Cunha ollada feminista esta charla poñerá o foco de atención no virus do papiloma, a menopausia, o desexo sexual hipoactivo e a incontinencia urinaria.
Dar voz a diferentes temas axudan a que se normalicen e deixen de ser un tema tabú, este é un dos obxectivos deste tipo de actividades.
A charla-coloquio está organizada pola Asociación Polamiúda un colectivo que ten como finalidade traballar pola inclusión da perspectiva de xénero, a igualdade e o respecto á diversidade en todo o que aconteza na contorna.
