Chantada volve recibir 4 Flores de Honra no certame Vilas en Flor
O movemento Vilas en Flor, impulsado en Galicia desde 2018 pola Fundación Juana de Vega, celebrou este venres en Carballo a entrega dos seus premios, que recoñecen as boas prácticas ambientais en municipios de menos de 40.000 habitantes.
Nesta edición participaron 41 municipios, destacando o Concello de Chantada, que obtivo por oitavo ano consecutivo a máxima puntuación de 4 Flores de Honra. O alcalde Manuel Lorenzo Varela, acompañado por representantes da área de Parques e Xardíns, recibiu a distinción das mans da Conselleira de Medio Ambiente, Ángeles Vázquez. Xunto con Chantada, tamén lograron este galardón os concellos de Tomiño, Allariz, Carballo e Salceda de Caselas.
O xurado valorou especialmente a recuperación de espazos verdes en Chantada, como a nova zona no barrio de Marín, a creación de áreas xardinadas nas rúas Emilia Pardo Bazán e Concepción Arenal, e a humanización da praza Luis García Arias en A Lama das Quendas. Ademais, destacou a conservación de carballeiras como a de San Lucas e as tarefas de replantación no Paseo Fluvial.
O alcalde salientou a aposta municipal por manter e mellorar as zonas verdes do municipio, agradecendo o traballo diario do equipo de Parques e Xardíns. Desde o Concello expresan a súa satisfacción por renovar este recoñecemento e a súa intención de estender estas melloras ambientais a todas as áreas verdes do municipio.
O programa Vilas en Flor busca recoñecer o compromiso continuo dos municipios coa protección e mellora do contorno natural e urbano, promovendo así unha mellor calidade de vida para os veciños e sinerxías con actividades económicas como o turismo.