Chantada pecha as Festas Patronais coa tradicional Festa da Empanada
Chantada puxo o broche final ás súas Festas Patronais na honra á Virxe do Carme, data que ademais é festivo local no municipio.
A cita contou cun dos momentos máis agardados polos veciños e visitantes, a xa emblemática Festa da Empanada, que cada ano congrega ducias de cuadrillas da vila e da contorna no Campo do San Lucas.
Milleiros de persoas participaron nesta proposta popular, que destacou polo seu bo ambiente e polo desenvolvemento sen incidencias, consolidándose como un dos actos centrais das festas.
A xornada estivo amenizada polos gaiteiros, Os Barrios e as charangas Unión Phenosa, NBA e Louband, que puxeron a nota musical durante o día.
O programa festivo pechouse cos concertos da orquestra París de Noia, que actuou na rúa Xoán XXIII, e da orquestra Capitol, que fixo vibrar a Praza de Santa Ana.