Chantada anima as noites de agosto cunha ampla programación cultural
O Concello de Chantada ten preparado un agosto repleto de propostas culturais pensadas para todos os públicos, que converterán a Praza do Cantón e a Praza de Galicia nos escenarios principais da actividade lúdica da vila. A programación do Verán Cultural 2025 inclúe espectáculos de maxia, música ao vivo, humor e teatro de rúa, cun calendario que aposta pola diversidade e o entretemento en familia.
A primeira cita será o venres 1 de agosto con múltiples funcións de maxia a cargo do Mago Antón, que se desenvolverán na Praza de Galicia. O sábado 2, a música tomará o relevo con A Banda dos Insectos, que actuará ás 20:00 h na Praza do Cantón. A diversión continuará o mércores 6, tamén ás 20:00 h, co espectáculo de clown Sinfonía Caótica.
O venres 8 de agosto está prevista a actuación de Conciencia Malabar, unha proposta de novo circo que comezará ás 21:00 h. Ao día seguinte, sábado 9, regresa a música cun concerto do grupo Noites á Luz da Lúa, tamén ás 20:00 h. O martes 12 arrinca o ciclo Cine no Cantón, que se prolongará ata o xoves 14 con proxeccións ao aire libre cada noite ás 22:30 h.
A programación continúa o sábado 16 co espectáculo de clown Rogelio3. La Fete, que encherá a Praza do Cantón de risas a partir das 20:00 h. Do luns 18 ao mércores 20 celebrarase a tradicional Semana de Teatro, con representacións diarias desde as 22:00 h.
O prato forte de agosto chegará do xoves 21 ao martes 26 coas festas patronais, que contarán con diferentes actividades culturais e musicais, tamén na Praza do Cantón, a partir das 20:00 h. Para pechar o mes, o sábado 30 haberá unha nova sesión de maxia con Flash & Brother, que actuarán ás 20:00 h.
O Concello de Chantada agradece a colaboración de entidades públicas e privadas e convida a veciñanza e visitantes a participar nun verán cheo de cultura, alegría e encontros ao aire libre.