Centos de nenos e nenas participaron este xoves na segunda edición da Carreira dos Picariños do Xeoparque
Este xoves, o Quiroga Trail Challenge achegouse por segundo ano consecutivo aos máis pequenos da comarca, organizando a Carreira dos Picariños do Xeoparque.
A proba estivo dirixida a todos os nenos e nenas dos centros educativos do Xeoparque Montañas do Courel e contou coa participación de máis de douscentos alumnos e alumnas de educación infantil e primaria, procedentes do CEIP de Quiroga, o CEIP de San Clodio e o CPI Poeta Uxío Novoneyra.
A carreira desenvolveuse pola mañá na Praia Fluvial de San Clodio e incluíu varias distancias adaptadas ás diferentes idades dos participantes.
O obxectivo desta actividade foi fomentar a práctica do deporte entre os máis pequenos e, ao mesmo tempo, segundo explicaron os organizadores, facer que comezasen a sentir o espírito do Quiroga Trail Challenge como algo propio, ligado á súa terra.
A organización do evento correu a cargo do Quiroga Trail Challenge, coa colaboración do Xeoparque da Unesco Montañas do Courel e dos concellos de Quiroga, Ribas de Sil e Folgoso do Courel, representados no acto polos seus alcaldes. Ademais, o Concelleiro de Deportes do Concello de Quiroga tamén se achegou ata a proba, na que todos os participantes recibiron unha medalla e gozaron dunha merecida merenda.