Completadas as obras de mellora na pista deportiva e na Casa do Concello de Bóveda
O Concello de Bóveda vén de completar os traballos de mellora da eficiencia enerxética na Casa do Concello e a pista deportiva municipal cun investimento de 51.479 euros financiado grazas a unha achega do Fondo de Cooperación Local.
Concretamente, os traballos desenvolvéronse por un lado na pista deportiva municipal situada próxima á Casa do Concello, onde se levou a cabo mellora da eficiencia enerxética mediante a renovación da iluminación. As obras consistiron na eliminación de tecnoloxía obsoleta, de baixa eficiencia enerxética e alto custo económico (luminarias antigas de haloxenuros metálicos), para instalar luminarias de nova tecnoloxía LED, máis avanzada, co obxecto de reducir o consumo enerxético, mellorar as prestacións e aumentar eficiencia enerxética das instalacións, e como obxectivo principal acadar unha mellor eficiencia enerxética da instalación.
Por outro lado, os traballos realizados no edificio do Concello tiveron como obxectivo modernizar as instalacións térmicas, para mellorar o servizo aos traballadores e aos usuarios, e acadar unhas instalacións enerxeticamente eficientes e modernas, busccando de reducir o consumo enerxético, e máis o económico, obtendo unhas prestacións térmicas axeitadas e mellorando a eficiencia enerxética das instalacións.
Neste caso, instalouse un sistema de calefacción mediante bomba de calor aire/auga, cunha unidade exterior e un depósito de inercia para alimentar aos emisores existentes mediante a rede de distribución existente no edificio, configurando unha instalación de mellor eficiencia enerxética, co que se acada un aforro enerxético, fronte ás instalacións térmicas antigas, ineficientes, obsoletas e que non proporcionan un axeitado nivel de confort.