Besteiro asegura que Feijóo "leva 14 anos xogando coa saúde dos lucenses"
![centro saude fingoi lugo](https://ribeirasacraxa.com/wp-content/uploads/2023/07/centro-saude-fingoi-lugo.jpg)
Lamentou os preto de 1.100 postos de traballo menos en Atención Primaria en Galicia, peche dos centros de saúde de Castro, Parga e Castro de Rei e agora tamén Nadela, que leva sen abrir todo o mes de xullo e ninguén coñece a data da reapertura, entre outras cuestións como o peche este verán de 144 camas de hospital na provincia: 68 no HULA, 38 no Hospital de Monforte e outras 38 no Hospital de Burela.
“Se non chega a ser pola presión da cidadanía e dos socialistas, con esas mobilizacións históricas nas rúas, Lugo continuaría sen o Servizo de Hemodinámica as 24 horas, Radioloxía e Medicina Nuclear no HULA. Porque para o PP e Feijóo os lucenses somos cidadáns de segunda, levan 14 anos xogando coa nosa saúde”. Así o denunciou o cabeza de lista do PSdeG-PSOE en Lugo polo Congreso, José Ramón Gómez Besteiro, diante do PAC de Fingoi na capital lucense, xunto a compañeiros socialistas que traballan no ámbito sanitario.
Besteiro advertiu que antes Feijóo e agora Rueda recortaron preto de 1.100 postos de persoal sanitario só en Atención Primaria en Galicia, pechando os centros de saúde de Castro, Parga e Castro de Rei, e agora tamén Nadela que leva todo xullo sen abrir as súas portas e ninguén sabe que vai pasar no futuro.
A dereita tamén deixou sen convocar 151 prazas MIR de médicos de familia, recortou 900 camas hospitalarias e precarizou as condicións laborais dos profesionais... “Ese é o balance do candidato do PP, cerrar sistematicamente a sanidade pública”, sinalou.
O candidato socialista censurou que a política sanitaria do PP sexa a de “recortar medios, privatizar e precarizar os servizos”, pese “ao esforzo investidor do Goberno de Pedro Sánchez para reforzar a atención primaria e a asistencia sanitaria “con 37,8 millóns de euros extras para Galicia”. Así, denunciou as “listas de espera desmesuradas que están a afectar a tantos lucenses e degradación dos servizos nos hospitais e PACs como o de Fingoi, no que chegan a atender en só unha xornada ata 200 pacientes”.
Gómez Besteiro denunciou que “este é o modelo que Feijóo pretende levar a toda España. Un modelo que en Lugo o coñecemos moi ben e que levamos sufrido durante 14 anos. Unha situación de maltrato constante, con decisións arbitrarias e irresponsables como o peche este verán de 144 camas de hospital na provincia: 68 no HULA, 38 no Hospital de Monforte e outras 38 no Hospital de Burela”.
Neste senso, precisou que “o Goberno de Pedro Sánchez é o que está a protexer a sanidade, facendo un esforzo sen precedentes”, precisando o importante impacto na provincia; “A modernización e dotación de equipos de alta tecnoloxía sanitaria, que en Lugo deixou 5,3 millóns e permitiu adquirir para o HULA equipos de radioterapia de precisión e varios TACs para os de Monforte e Burela; ou o reforzo de enfermeiras, fisioterapeutas e nutricionistas na atención primaria do rural, fundamental para unha provincia como a de Lugo”.
SÁNCHEZ IMPULSARÁ O PLAN DE SAÚDE MENTAL
O cabeza de lista ao Congreso avanzou que se Pedro Sánchez segue liderando este país unha das primeiras leis que aprobará será reducir os tempos de espera na sanidade pública e impulsará o Plan de saúde mental con 100 millóns. Tamén confirmou que os socialistas seguirán apoiando todas as mobilizacións dos profesionais sanitarios “porque é de xustiza e nos vai a vida niso”.