A música tradicional soou en Xunqueira de Espadanedo para apoiar aos gandeiros afectados polos incendios

Bandas de música de toda a provincia deron cita no Mosteiro de Santa María de Xunqueira nun concerto solidario organizado pola asociación Os Xuncos

Actuación da Banda de Maceda no concerto solidario polos incendios en Xunqueira de Espadanedo

Este pasado sábado, 28 de setembro, o Mosteiro de Santa María de Xunqueira de Espadanedo foi escenario dun concerto solidario co obxectivo de apoiar aos gandeiros e gandeiras da zona que sufriron perdas durante os incendios que arrasaron Galicia o pasado agosto.

Organizado pola asociación Os Xuncos, o evento reuniu diferentes grupos e bandas de música tradicional nun mesmo escenario para transmitir esperanza e acompañamento. “A música acompaña, arroupa e tamén cura. Por iso queremos estar ao carón dos nosos gandeiros e gandeiras e recadar fondos que lles axuden a levantarse”, explicaron os organizadores.

Entre os participantes estiveron Os Trabazos (Castro Caldelas), Ruxideiras e Ailá Tarambaina (Arnuide, Vilar de Barrio), a Banda de Gaitas de Esgos, representantes de Os Trintas de Trives e Maceda, Aturuxo do Cenza (Vilariño de Conso), O Lobo da Xente (Xinzo de Limia) e a banda de gaitas Os Xuncos e Xunquereteiras de Xunqueira de Espadanedo.
Todo o recadado destinarase íntegramente aos gandeiros afectados polos incendios.
O concerto combinou música e solidariedade, ofrecendo apoio á comunidade rural e devolvendo esperanza a quen perderon todo co lume.