Avanzan as obras da nova sede de atención temperá de Quiroga
Continúase cos traballos no edificio multiusos da Ribeira para acoller a Unidade de Atención Temperá. Esta unidade, unha vez rematen as obras, ocupará a segunda planta do edificio que xa acolle o Centro de Día.
Ata estas obras que está a realizar o Obradoiro de Emprego SilLor VII achegábase o rexedor local, Julio Álvarez, e a concelleira de servizos sociais, Loli Sánchez.
A Unidade de Atención Temperá nestes momentos da servizo aos concellos de Quiroga, Ribas de Sil e Folgoso do Courel, e a outros tres concellos que acaban de adherirse: Bóveda, O Saviñao e Sober.
Posto en marcha no pasado mes de setembro polo Concello de Quiroga serve para identificar, previr e actuar sobre os trastornos no desenvolvemento que poidan sufrir os nenos e nenas de 0 a 6 anos de idade. A unidade conta cun equipo formado por tres profesionais: un psicólogo, un logopeda, e un fisioterapeuta; especializados en desenvolvemento infantil e atención temperá.
A Unidade de Atención Temperá, que contou con achegas económicas da Xunta de Galicia, da servizo nestes momentos a máis dunha vintena de cativos, axudándoos a un desenvolvemento evolutivo adecuado. Coa ampliación a tres concellos máis este servizo, ao que poden acudir os nenos sen que teñan problema definidos, se non que pode axudar a un desenvolvemento evolutivo adecuado, verá incrementado o seu número de usuarios.