As traballadoras do SAF de Quiroga participan nunha xornada formativa sobre atención a maiores
As traballadoras do Servizo de Axuda no Fogar (SAF) do Concello de Quiroga participaron a pasada fin de semana nunha xornada formativa centrada na atención e no coidado de persoas maiores nos seus fogares. A actividade foi organizada polo propio Concello e pola empresa Attende-Care, adxudicataria do servizo.
A sesión comezou cunha charla impartida pola coordinadora do SAF e empregada de Attende-Care, Galia Fernández, que expuxo aspectos básicos relacionados coa atención a domicilio, como o papel do servizo na vida das persoas dependentes, o marco legal, a súa financiación, a estrutura organizativa, a prevención de riscos e os dereitos e obrigas tanto das auxiliares como dos usuarios.
Posteriormente, desenvolveuse unha parte práctica na que varias auxiliares fixeron demostracións de técnicas de coidado, centradas en aspectos como cambiar unha cama coa persoa usuaria nela, modificar posturas, aplicar métodos de hixiene e baño, ou manexar unha grúa para trasladar a unha persoa da cama á cadeira e viceversa. Para iso empregáronse distintos dispositivos, como unha cama articulada, unha grúa de elevación e unha cadeira adaptada.
A xornada permitiu resolver dúbidas xurdidas durante a exposición teórica e facilitou a interacción entre as participantes, especialmente ao ser as propias traballadoras quen levaron a cabo as demostracións prácticas.
Ao remate da actividade, o concelleiro de Servizos Sociais, Xosé Manuel Fernández, visitou o grupo para trasladarlles o compromiso do Concello coa mellora do servizo e o seguimento continuo que mantén coa empresa concesionaria. Agradeceu o traballo das auxiliares e lembrou algunhas das accións en marcha, como as reunións periódicas de seguimento, as sesións formativas e os encontros directos coas traballadoras.
No peche tamén participou Nerea Rozados, responsable de Attende-Care en Galicia, quen destacou a importancia do labor que desempeñan as traballadoras e o compromiso da empresa por seguir mellorando o servizo e manter unha comunicación fluída co Concello de Quiroga.