As Merendas con Contos de Sober festexan o Mes das Letras

Haberá unha actividade cada venres na Biblioteca Municipal de Sober destinada aos nenos nenas do municipio

Merendas con Contos, Sober

As Merendas con Contos da Biblioteca de Sober deste mes de maio festexan o ‘Mes das Letras’, co gallo do Día das Letras, que este ano homenaxeará ás cantareiras.

O programa arranca este mesmo venres coa lectura ‘As letras da Galicia pequeniña’ e o obradoiro ‘Xogamos coas letras’. O 16 de maio será a quenda da lectura ‘Cantareiras. A poesía popular nas Letras Galegas’, e o obradoiro ‘Contos e Lendas’, con Antía Vázquez e o músico André Espiñeira.

O venres 23 de maio a lectura escollida será ‘Diferentes diferenzas’, de Silvia Penide Emilio Urbruaga, e o obradoiro posterior será impartido por Paula Santos, educadora social, baixo o título ‘Conectando en Igualdade. Sentimos para respectar’. Por último, para rematar o mes, as Merendas con Contos irán ao cine.

Todas as actividades, postas en marcha dende o Concello de Sober co obxectivo de fomentar a lectura entre os máis pequenos, desenvolveranse entre as 16.30 e as 19.00 horas nas instalacións da Biblioteca Municipal.