Arrancan as Festas Patronais de Chantada cun cambio de última de hora
O Concello de Chantada dá comezo hoxe ás súas Festas Patronais en honra á Virxe do Carme, que se celebrarán do 21 ao 26 de agosto, cun cambio na programación musical da primeira xornada.
Inicialmente, a noite de hoxe contaba coa actuación de Malenne e Son de Rosas (tributo a La Oreja de Van Gogh) na Praza de Catro Camiños a partir das 23:30 horas. Porén, debido á baixa do vocalista de Malenne, será La Disquetera, tamén unha banda de versións de pop rock español, a encargada de subir ao escenario.
O venres 22 de agosto terá lugar unha nova edición do Festival de DJ´s, bautizado como “Ata o Chan Festival”, na Praza do Pavillón de Chantada desde as 23:30 horas. O cartel inclúe artistas para todos os gustos e idades, como Michenlo, Groove Amigos, Carlos López, Marcos Magán e Dmirón.
O sábado 23 destaca polo Folión de Carros, Festa de Interese Turístico Galego e Ben de Interese Cultural (BIC), que comezará ás 23:00 horas co desfile encabezado pola Banda de Gaitas do Concello de Chantada e a Agrupación Tradicional da Casa da Música. Nesta edición participarán 14 carros, e ao remate do desfile, o pregoeiro Roberto Fernández Álvarez, Doutor en Medicina pola USC e fillo de Don Xilberto de San Pedro, lerá o pregón vinculado á tradición dos carros. A noite rematará coa actuación da orquestra Tango na Praza de Santa Ana desde a 1:00 horas.
O domingo 24, o programa inclúe o XXXIV Certame de Bandas de Música na Praza do Cantón ás 18:30 horas, coa participación da Banda de Música de Chantada, Banda de Música de Lantaño e Banda de Música da comarca de Sarria. Tamén actuarán as orquestras Olympus e Cinema. O luns 25 pecharán a xornada nocturna o Grupo Top Líder e a orquestra Gran Parada.
O martes 26, festivo local, rematarán as Festas coa tradicional Festa da Empanada no campo do San Lucas. Haberá un servizo de autobuses desde as 11:30 horas ata as 21:00 horas entre a Praza de Santa Ana e o lugar de celebración, con billete a 3€ por viaxe. Durante a xornada actuarán en directo distintos grupos, quedando prohibido o uso de equipos de música particulares. Pola noite, os concertos estarán a cargo da orquestra París de Noia en Xoán XXIII e a orquestra Capitol na Praza de Santa Ana.
O alcalde de Chantada, Manuel Lorenzo Varela, animou á veciñanza e visitantes a participar nas diferentes propostas, destacando que estas Festas combinan tradición, música e encontro comunitario. O cartel das Festas é obra do artista local Jon González (JonGo Art).