Alerta laranxa no sur de Lugo e varios puntos de Ourense por altas temperaturas
A Xunta de Galicia mantén hoxe a alerta laranxa por altas temperaturas no sur de Lugo, que inclúe concellos como Bóveda, Monforte de Lemos, Chantada, Sober ou Quiroga, e na Montaña de Ourense, con localidades como O Bolo, Castro Caldelas, A Gudiña ou Parada de Sil. Pola súa parte, o noroeste de Ourense e o Miño de Ourense están en nivel amarelo, mentres que a zona de Valdeorras, que onte estivo en nivel vermello, baixa hoxe a alerta laranxa, afectando concellos como O Barco de Valdeorras, A Rúa, Rubiá ou Vilamartín.
Ante esta situación, a Secretaría Xeral para o Deporte suspendeu a actividade deportiva federada ao aire libre ata as 21:00 horas nos concellos afectados pola alerta laranxa, aínda que se permiten as actividades acuáticas, sempre que se eviten durante as horas centrais do día, entre as 12:00 e as 17:00 horas.
A Consellería de Sanidade lembra que os grupos máis vulnerables fronte ao calor son as persoas maiores de 65 anos, os nenos menores de catro anos, especialmente os menores dun ano, e quen padece enfermidades crónicas como problemas cardiovasculares, diabetes, enfermidades respiratorias ou neurolóxicas. Tamén se inclúen quen toman determinados medicamentos, consumen alcohol de forma habitual ou realizan traballos ou deporte ao aire libre durante varias horas.
Entre as recomendacións, Sanidade aconsella beber máis líquidos sen esperar a ter sede, evitar bebidas quentes, alcohólicas ou moi azucradas, aumentar o consumo de froitas, verduras e ensaladas, usar roupa lixeira de tecidos naturais, aplicar protección solar, permanecer en espazos ventilados ou con aire acondicionado e reducir a actividade física nas horas de máis calor. Ademais, recorda non deixar a nenos nin persoas maiores en vehículos pechados e aproveitar as habitacións máis frescas da vivenda, mantendo as persianas baixadas durante o día e ventilando pola noite.