Agroma Sober-IGV pide garantir a seguridade viaria na estrada LU-P-5901 entre Sober e Canaval
Agroma Sober-IGV rexistrou hoxe un rogo dirixido ao Equipo de Goberno Local de Sober para instar á Deputación de Lugo que se acometan canto antes as medidas provisionais necesarias para garantir a seguridade viaria na estrada LU-P-5901 (Sober-Canaval) mentres non se repara.
A estrada provincial 5901, que une Sober con Canaval leva anos con múltiples fochancas e cun tramo estragado pola baixada de augas dende a ladeira de Sistín do Mato, denuncian.
En canto rematen as obras de ADIF na estación de Canaval que, sinalan, “agravaron o deterioro da estrada polo paso continuo de camións”, está previsto o seu arranxo por parte deste organismo. Non obstante, advirten de que é necesario actuar con medidas de seguridade mentres non se resolven os problemas da estrada.
“A estrada é perigosa, sobre todo cando chove, e pode provocar saídas de vía”, denuncian. De feito, explican, “houbo que parcheala provisionalmente uns días antes da Feira do Viño de 2024, mais de seguido se deteriorou de novo”.
“É por iso que, mentres non se arranxa, sería necesario que se volvera parchear ou, canto menos, que se coloquen sinais de perigo e redución de velocidade, especialmente no tramo inundable por baixo de Sistín do Mato”, piden dende Agroma Sober-IGV.
Ademais, tamén solicitan trasladar á Deputación de Lugo e a ADIF a necesidade de que o futuro proxecto de mellora da estrada LU-P-5901 (Sober-Canaval) contemple unha solución estrutural para o tramo inundable á altura de Sistín do Mato.
Así mesmo, denuncian que a estrada de Vilela (estrada municipal á que se accede desde esta vía provincial) presenta problemas similares e tamén moi afectada polas correntes de auga, polo que tamén propoñemos ao Concello unha solución.
“Tomé vai destinar case 60.000 euros ao asfaltado dun camiño que non leva a ningures en Antas de Ulla, para seguir enterrando cemento nun suposto Parque Central de Galicia que só está destinado a facer propaganda da Deputacion e do seu Presidente”, sinalan dende Agroma Sober-IGV, que entenden que “o prioritario debería ser manter en bo estado as vías provinciais máis utilizadas, coma esta estrada Sober-Canaval, que está en estado lamentable”.