Afonso Losada da CIG comprobou os danos na ladeira da montaña de Folgoso do Courel
O Secretario Comarcal da Federación da Construción e da Madeira da CIG en Lugo-A Mariña, Afonso Losada, visitou o pasado xoves a nave de elaboración de lousa de Pizarras La Campa en Folgoso do Courel a fin de comprobar os efectos do derrubamento producido na ladeira da montaña na que está situada a empresa e a súa canteira no Concello de Folgoso do Courel.
Unha vez alí, puido constatar, acompañada da delegada da CIG e membro do comité de empresa Tania Cobo, os danos producidos polo derrubamento da ladeira da montaña sobre a que se asenta a canteira de lousa de Pizarras La Campa e a carón da nave de elaboración.
O derrubamento de dúas galerías nas que afortunadamente non se estaban a realizar labores extractivas, provocou o derrubamento da ladeira da montaña ocasionando graves danos na estrada Lu-651 que quedou inutilizada nun tramo de 200m.
“Ao día seguinte ao derrubamento, a empresa xa requiriu aos traballadores a acudir a traballar pola tarde, a pesar da inquietude da plantilla e sen ofrecer mais explicación ca “está todo en orde” relata Afonso Losada, quen intentou visitar a zona da canteira para comprobar in situ os danos, sen que dende a empresa se llelo permitirán e sen dar mais explicacións ca “están os nosos técnicos revisando e está todo en orde e isto é un tema interno da empresa” denuncia Losada.
“É por iso, que dende a CIG imos solicitar unha reunión do comité de empresa coa dirección para que nos aporten informes técnicos que avalen a continuidade dos traballos e a seguridade de que non vai a haber afectacións futuras en zonas de labor para, dese modo, axudar a tranquilizar ao persoal. Reclamamos porén, redobrar as medidas de seguranza e inspección na ladeira da montaña e en tódalas zonas de labor, tanto na canteira, coma na propia nave, que está moi preto da zona afectada.
Posteriormente á visita na empresa, os responsables da CIG dirixíronse ao Concello de Folgoso do Courel onde foron recibidos pola alcaldesa Dolores Castro a pesar de non ter concertada unha cita. “É de agradecer que a sra. Alcaldesa nos recibira e nos aportara a información que obra no seu poder e que resultou, moitísimo mais ampla que a aportada pola empresa.” Incide Afonso Losada quen resaltou a preocupación mutua polo estado da ladeira da montaña e polas repercusións futuras nos empregos, así como pola propia comunicación por estrada do Concello e da propia empresa”
Neste sentido, dende a CIG e, despois de comprobar o estado da estrada alternativa que están a empregar veciños e traballadores e traballadoras, reclama a realización de traballos de mellora urxentes nas devanditas vías, tais coma a ampliación da estrada onde sexa inmediatamente posíbel a fin de favorecer o cruzamento de vehículos dada a estreitez da vía e o realfastado para mellorar o firme, posto que os traballos na LU-651 se van a demorar cando menos varios meses” reclama Afonso Losada.