Adxudicadas por 2,7 millóns de euros as obras de mellora do firme en 6 estradas autonómicas na provincia de Ourense

A Consellería de Vivenda e Planificación de Infraestruturas vén de adxudicar por 2.676.874 euros a execución das obras de mellora do firme en 6 estradas autonómicas ao seu paso por 7 concellos da provincia de Ourense.

Trátase de rehabilitar o firme en varios treitos das estradas OU-533, OU-602, OU-603, OU-622, OU-636 e OU-933, que discorren polos concellos do Bolo, Petín, Larouco, A Rúa, O Barco, Rubiá, Pobra de Trives. No caso de OU-636 se intervirá no municipio lucense de Quiroga.

Este contrato, adxudicado á empresa Aglomerados y Construcciones Valdeorras S.A. (Acoval), asinarase nos vindeiros días e o obxectivo é poder iniciar as obras na primavera, dependendo das condicións meteorolóxicas. Os traballos contan cun prazo de execución de 4 meses.

Os traballos consistirán en realizar fresados localizados nos treitos de actuación e na reposición con mestura bituminosa en quente, segundo as necesidades concretas das vías obxecto destas intervencións.

As actuacións completaranse co pintado da sinalización horizontal dos treitos de actuación de todas as estradas e a reposición dos treitos de barreira de seguridade que sexa preciso.

O departamento que dirixe María M. Allegue mantén o seu compromiso coa seguridade viaria e a conservación das estradas, ámbitos para os que os Orzamentos de 2025 recollen partidas que suman máis de 68 millóns de euros un 30% máis que o pasado ano.