Adxudicada por preto de 146.000 euros a mellora da vía que comunica os núcleos de Soutelo e Manzaneda
A Consellería de Vivenda e Planificación de Infraestruturas adxudicou por un importe de 145.800 euros as obras de mellora do viario que conecta co núcleo rural de Soutelo, na parroquia de San Martiño, no concello de Manzaneda.
Os traballos, que serán executados pola empresa Explotacións Medioambientais S.L.U., enmárcanse no Plan Hurbe, co que a Xunta colabora cos concellos galegos en actuacións de mellora urbana, accesibilidade e equipamentos públicos, co obxectivo de impulsar a revitalización e o equilibrio territorial.
O proxecto, cun prazo previsto de execución de catro meses, contempla a renovación do pavimento, das beirarrúas e da senda peonil na estrada que une San Martiño co núcleo de Manzaneda, ademais da revisión das redes de pluviais e da creación de pequenas zonas verdes.
O viario, coñecido como “subida a Soutelo”, ten unha lonxitude de 560 metros e é moi utilizado polos veciños de Manzaneda, Soutelo, San Martiño e Rozavales, xa que constitúe a principal vía de conexión entre estes núcleos e enlaza coa estrada provincial que une Manzaneda con A Pobra de Trives. Tamén é frecuentado por turistas que visitan unha zona destacada polo seu valor paisaxístico, etnográfico e arquitectónico.
Segundo o convenio asinado entre a Xunta e o Concello de Manzaneda, o Goberno galego asumirá o 70 % do custo da actuación, ademais de contratar e executar as obras, mentres que o concello achegará o 30 % restante.