Adif licita en 3 millóns de euros melloras no tramo Covas-Monforte
![vía tren adif](https://ribeirasacraxa.com/wp-content/uploads/2021/03/via-tren-adif.jpg)
Adif vén de licitar, por preto de 3 millóns de euros, o contrato para a rehabilitación do cable de enerxía de 2.200 V no tramo Covas-Monforte de Lemos, pertencente á liña de ancho convencional León-A Coruña.
O tramo Covas-Monforte de Lemos, duns 85 quilómetros de lonxitude, forma parte do Corredor Atlántico ferroviario, no traxecto Vigo-Ourense-Monforte de Lemos-León. Actualmente, o tramo dispón dun sistema de alimentación de 2.200 V que proporciona enerxía ás instalacións de sinalización ao longo de toda a liña.
O obxectivo final do investimento que se vén de licitar, e que conta cun prazo de execución de 12 meses, é modernizar e mellorar a fiabilidade do sistema de enerxía que alimenta as instalacións de seguridade que controlan o tráfico ferroviario, permitindo así aumentar a calidade do servizo.