ADIF adxudica a electrificación do tramo Monforte-Lugo
![mapa adif](https://ribeirasacraxa.com/wp-content/uploads/2021/09/mapa-adif.jpg)
O Consello de Administración de Adif autorizou na súa última reunión a adxudicación do contrato para as obras de execución do proxecto construtivo de electrificación do tramo Monforte de Lemos-Lugo, por un importe de 17.249.580,48 euros (IVE incluído) e un prazo de 18 meses.
O contrato, adxudicado á UTE formada polas empresas Moncobra e Teléfonos, Liñas e Centrais, enmárcase nas actuacións promovidas por Adif para a mellora da conexión ferroviaria entre Ourense, Monforte de Lemos e Lugo, co obxectivo de incrementar a súa calidade e fiabilidade.
A actuación consiste na instalación de liña área de contacto entre as estacións de Monforte de Lemos (Porto Seco) e Lugo Mercadorías (liña León-A Coruña), un subtramo que na actualidade non está electrificado.
A nova electrificación abarcará un tramo de algo máis de 73 km, entre os puntos quilométricos (pp. kk.) 363/403 e 436/605 da liña León-A Coruña, correspondentes á saída da estación de Monforte de Lemos e á saída da estación de Lugo Mercadorías. Inclúe a electrificación das estacións de Rubián, Oural, Sarria, A Pobra de San Xiao, Laxosa, Lugo e Lugo Mercadorías.
Instalarase liña área de contacto de 25 kV de corrente alterna, tipoloxía propia das novas electrificacións. Os seus principais características son as seguintes:
- Catenaria simple poligonal atirantada, formada por un sustentador apoiado e un fío de contacto. A liña de contacto estará compensada mecanicamente de forma independente para o sustentador e para o fío.
- Sistema de retorno de tracción con cable de retorno e carril principal de retorno.
- Velocidade de deseño da catenaria: 200 km/ h.
MELLORAS NO TRAMO
As actuacións de mellora do tramo en servizo Ourense-Monforte de Lemos-Lugo, nas que se enmarca esta adxudicación, teñen como obxectivo cumprir os compromisos de Adif coa mellora das condicións de explotación comercial do traxecto, en parámetros tales como a fiabilidade, o confort e os tempos de viaxe.
Entre as principais actuacións previstas atópanse a adaptación da infraestrutura ás novas condicións de explotación, o cambio de electrificación de 3 kV a 25 kV no tramo Ourense-Monforte de Lemos e a electrificación a 25 kV do tramo Monforte de Lemos-Lugo, obxecto do presente contrato.
Ademais, xa se atopa en servizo desde abril de 2018 a variante da Pobra de San Xiao, entre Monforte de Lemos e Lugo. Entre os principais beneficios deste novo trazado, dun 7 km de lonxitude, destaca a supresión dos 14 pasos a nivel do anterior trazado, co consecuente aumento da seguridade ferroviaria, viaria e peonil, así como o incremento da velocidade de paso dos trens ata o 160 km/ h.
Todas estas obras contribúen á consecución do Obxectivo de Desenvolvemento Sostible ( ODS) número 9, que ten entre as súas metas desenvolver infraestruturas fiables, sostibles e de calidade.
Esta actuación vai ser financiada pola Unión Europea – NextGenerationEU.