Acción contra a Fame organiza un “Free Tour” por diferentes negocios de Monforte de Lemos
O próximo mércores 10 de decembro, ás 12:00 horas, Acción contra a Fame realizará un “Free Tour” por Monforte de Lemos. Durante esta actividade visitaranse distintos negocios locais nos que os propios emprendedores compartirán as súas experiencias e o día a día dos seus proxectos.
Esta iniciativa forma parte do Clube de Emprego, un espazo creado para que as persoas emprendedoras ou con interese en emprender poidan coñecerse e crear sinerxías. Esta proposta enmárcase dentro do proxecto Comunidades de Emprego e Emprendemento rural sostible, financiado por FSE+ e a Fundación MAPFRE.
O punto de encontro será a Praza de España en Monforte, e o percorrido desenvolverase entre as 12:00 e as 13:30 horas. Os desprazamentos entre o punto de inicio e os negocios serán curtos para evitar problemas en caso de choiva.